媽媽的背影

若想着媽媽就會想着媽媽的背影

 2010.03

細漢厝內散赤,聽序大人咧講:分厝的時,kan-ta分着半厘地,佮一把箸、十二塊碗但定,阿爸ka7人牽牛車,阿母一工到暗不是去田裡作穡,就是飼牛、飼豬、飼雞鴨,雖然媽媽這呢打拚,厝內嘛是扑be7過,稻仔若收成就愛擔去米ka2還賬。有時陣大姐欲註冊繳冊錢,厝裡沒半sian2,六月冬e稻仔提去抵賬,晚冬e稻仔、才抵咧結穗,無法度、媽媽只好擔留欲做種的chhek,去刣豬仔伯彼借錢,逐擺我豎佇門口庭看媽媽的背影,愈行愈遠、愈遠愈細,就足怨嘆是按怎阮兜這呢散,大漢讀着「青黃不接」這句成語,目屎四淋垂、流be7煞,我想着的就是媽媽擔chhek e5畫面,原來佇媽媽肩胛頂面的重擔,我早就識這句話,我就知影散赤人e日子歹過。

 

這是我細漢對媽媽背影e5印象。

大漢e時陣、媽媽e背影,代表的往往就是阿爸佇鬼門關kah黑白無常相拼。

Hit個時阿爸常在佇沙鹿入院,我拜六坐復興號去看伊,阿爸有時好有時足害,阿爸若好勢好勢,母仔子就相招去食自助餐,媽媽攏叫苦瓜鹵佮豆腐,我講加點一項爌肉抑是蛋好booh?媽媽有時講好有時搖頭,復講伊不知是m7是欲辭五穀囉,若無哪會食be7落去,我叫伊m7通烏白想,家己的心肝放乎清才有氣力通顧病人。阿爸若較嚴重的時,媽媽就叫我家己去,媽媽就講你老爸穩當顧be7起來,我買返來的物件、母仔子就攏食boe7落喉。禮拜下餔我坐醫生館e5交通車欲去車頭坐車,媽媽boe7放心,逐次攏出來kap我做伙等車,車來,伊就趕我上車。我講時間猶未到車be7發,伊講先peh起去才有位通坐,我坐佇車頂無法度佮媽媽講話,攏用手比,叫伊先入去,有時伊搖頭,有時就越頭行,媽媽本來小可肥肥,少年的時陣阿爸攏叫伊ABS(一種代奶粉的名稱),雖然七十外、頭毛猶無全白,hit站仔顧阿爸傷thiam2,規個頭續攏白了了,連行路嘛腳步浮浮,伊boe7放心我家己坐車返去台南,但是,我顛倒較boe7放心伊,雖然伊有外勞通做伴,暗時阿姊小弟嘛會來,不過伊有歲-a3 koh不識字,孤一個人佇醫生館,愈想愈怪家己e不孝,雖然醫生館人hiah呢濟,媽媽伊e7-tang3偎靠的攏無半個,看伊頭犁犁,行kahtuh-tuh e5背影,hiah呢矮細、hiah呢孤單,我心肝未輸打結球,我足想欲將頭路辭掉,返去佮伊做伴,哪知阿爸規尾也是放阮作伊去,家己先做前去囉,koh khah無想着、七年後媽媽嘛toe3阿爸後面去-a3,從此欲看媽媽e背影、只有佇夢中。媽媽e5背影從此嘛永遠toa3佇我的心肝芛仔內底!

 

 

創作者介紹

阿等

adan2008 發表在 痞客邦 PIXNET 留言(0) 人氣()