2010.03

前言

  自從來學台語課了後,頭殼內的資料庫哪親像攏打開-a,記憶的匣仔內、思念無法度koh囥會tiau5,一件件、一樁樁的往事,無踜斷在胸中滾絞,特別是抵仔過先母逝世二周年的忌日,心中的哀毀沮痛m7是外人所會當理解,先父別世已經七冬,不過伊辭世前纏綿病痛十外冬,最後三、四個月就已經m7知人、無法度佮外界溝通,因按呢阮對伊的仙去雖然chiann5不甘,卻佇預料之中。而先母是佇咧佮親人好友歡笑開講中,自按呢離開,hit種晴天霹靂的痛擊,這種的痛、為人子女的,m7知欲按怎來形容,孤哀子兩年,深深體會出詩經:「出則無恤,入則靡至」的哀痛,因按呢將失恃失怙的悽慘寫--落來。

 

   人咧講真正會記的才是生命,若按呢下面的每一項、攏是我的父母用in的生命為我寫的。

  我是八七水災死無去的囝仔,所以父母特別疼我。會記得細漢的時陣,阿爸上愛摸我的頷頸仔講:「na2會即呢細支,敢飼會活?」,結婚了後,逐擺若返去外家厝,阿爸看着我返--來,就趕緊叫妗仔去刣粉鳥炸予我食,不過阮阿爸攏不知影我不敢食粉鳥肉,自細漢,我若看着規巢粉鳥佇彼咧咕咕叫,身軀復攏是雞tai5,我驚就驚死、猶敢食,不過我不敢觸阿爸的好意,攏掩掩掩掩騙阿爸講好食,尾仔三年,阮阿爸的目睭偆無三分目,我欲按怎騙,阿爸嘛不知,啊!我是按怎這呢巧咧?食一嘴粉鳥肉敢會死是booh,今仔日後悔有啥乜路用,茫茫人海、敢有啥乜人會問我一句:「欲食粉鳥肉booh?!」

  每一擺我返外家(兄弟姊妹攏toa3佇外家附近)攏是天大地大的事誌,大姐、二姐、三姐攏會返來開講。厝庭本來就有一口三尺二的大鼎,就地會當使用,二姐、三姐賢煮飯,做總舖師,我佮大姊做水腳,媽媽刣雞仔鴨仔,老爸走去菜市仔買chhenn-chhau,老大人記tih bai2,o-too-bai(摩托車)走幾若tsoa嘛買boe7全全,實在予伊老大人真勞動。

  復有一擺我返去,大家食飽,相招去田裡挖土豆,小弟用鋤頭將土堀乎鬆,阮toe3佇後面khioh,大家na2 khioh na2開講、足趣味,無若久外勞捒阿爸來看阮,阿爸一直喝,不過傷遠攏無聽着,媽媽較了解阿爸,我講、恁老爸不甘你曝日頭欲叫你起來。阿姐講:「着啦!屘仔囝食較有乳,你緊peh去起啦」……啊!父母攏無-a7,以後有啥人會疼惜較頇顢的屘仔子?!

  阿爸疼我、媽媽特別疼我疼到腳目下,e7-tang3做阿爸佮媽媽的囝仔實在足好命!會記得有一擺我挽嘴齒疼kah be7食,我敲電話kha媽媽sai-nai,媽媽叫我返來,講欲煮糜予我食……我一下--返來、媽媽驚糜傷燒,一碗糜分做十外碗,予我一碗做一嘴,逐家攏笑媽媽賢寵囝子。到今仔日,透早時仔,我家己的囝仔糜若傷燒不敢食,我共款嘛ka7伊分做幾若碗予in食,我才知影有媽媽通惜的人是若好命,不過媽媽不是乾焦對我偏心,對阮姐弟攏共款,逐工若不是叫阮返來挽菜,就是叫阮返來抓雞,今仔日序大人無去a3!後擺阮若復身苦病痛,敢猶有人會煮糜予阮食?敢猶有人會焄蚶殼仔、烘雞肉……叫阮去食咧,啊!世間竟然有無父母的人,這種悲哀您敢會知?

  古早人咧講:「父母疼子長流水,子想父母樹尾風」,今仔日無父母通想囉,連樹尾風嘛無法度想-a7,chit-chun7才知無父母的人、較輸路邊的野草,這種苦楚、敢有人會知?!

 

arrow
arrow
    全站熱搜

    adan2008 發表在 痞客邦 留言(1) 人氣()