2010.2.28

    三叔公是阮阿公的叔伯小弟,在我六歲以前我對伊沒印象,一直到有一工我行過大廳聽到鑼鼓的聲,復有查甫人尖著喉嚨在唱歌仔戲,歌詞大約是:「我清早e起來啊鬧啊chha-chha,王婆起來啊掛店牌,店牌掛起寫三字,要寫三字見來成……」,原來這是內子弟戲在練習,聽講卡早阮老爸還在咧是搬小生,柳仔叔做小旦,啊那今仔在唱的是丑仔,我愛叫伊三叔公。

三叔公跟阮家族的人同款,若田裡有拾頭就拾頭,若無就替人牽牛車,雖然我叫伊三叔公,不過伊的年紀跟阮老爸差不多,所以跟阮老爸相好,三嬸婆不時在講你矮仔東(阮老爸)跟inn三叔最好,做陣若不是牽牛車,放粉鳥、keng班鳩,若無就是做伙去tsam酒家,inn三叔歹龜帶頭,無站沒節,足不是款……

  若講到三叔公tsam酒家的漏氣事,有影是通莊人人知,事誌是因為那年六月冬稻仔豐收,牛車多牽幾若台,煞落去菜頭嘛很好價,逐工攏有牛車通牽,心情很輕鬆,尾車拖了,萬叔仔招欲去行菜店喝燒酒,三叔公講查某人剛生囝仔,這擺不通去,欲佇厝跟查某人做伴,大家笑伊沒冬至就欲搔圓仔,不要假仙啦,行啦,三叔公愛鬧熱,復不堪咧招,就去囉。返來的時陣,已經是醉茫茫啊,行到半路雄雄腹肚疼,要放屎,大家叫伊去路邊khu5一下,無粗紙就用路邊的稻草keh一下就好……事誌明白,到厝就睏。沒想到天光煞看到三嬸婆抱紅嬰仔在灶焢前在哭,三叔婆講昨晚三叔公一入房間就看到一個青面獠牙無穿衫的查甫人在房間要抓要lih,伊若跑出房間就沒事誌,若入房間就復害,伊驚ka不敢住房間,三叔公酒醉復叫不醒,不才會帶囡仔睏灶下,三叔公一回想,才想到昨晚keh尻川的感是不是稻草是人在祭煞拜外方仔的草人,這好兄弟入月內房太陰跑不會出來,才會按呢,尾仔就緊叫莊內的法師天美師來辦辦咧,才化去。不過事誌雖然過去啊,inn那些牽牛車伴不時嘛虧伊講目睭不通chhu-chhu,便所給伊看做hotel,草人給伊看做稻草喔……

 

arrow
arrow
    全站熱搜

    adan2008 發表在 痞客邦 留言(0) 人氣()