媳婦仔 @ 阿等 :: 痞客邦 ::

分媳婦仔，是漢文化的一種婚姻習俗，一般攏是將猶未成年的查仔kiáⁿ送去別人兜飼、抑是用賣的，等買彼個家庭的後生大漢才ka捒做堆、結做翁妻(某)。這種情形台語呼作媳婦仔[sim-pū-á]。

佇四十、五十年代抑是復較早進前，ㄧ般庄腳(莊稼)人的生活攏是種作為主，無親像今仔這呢多元富裕，偏偏仔復無避孕的常識，逐個家庭的囝仔攏真濟，子濟雖然真好命，不過頭嘴濟食穿的問題就真麻煩，所以一般人攏有這款共同的壓力，囝仔大漢嫁娶的事誌猶較大條，所以才會發展出「媳婦仔」這個風俗。亦就是子濟的人將囝仔送hō͘較好額的人飼，不過傳統的觀念攏是重男輕女，大家攏愛飼查甫的，無愛飼查某的，按呢hiah的查某囝仔欲按怎咧？有一部分就hō͘後生生較濟，驚別日仔娶無某的人飼做「媳婦仔」，若真正飼bōe起、只好賣hō͘人做「查某嫺仔」！

做「查某嫺-á」佮做「媳婦仔」敢有無同?ㄧ般來講做人的查某嫺，干焦負責洗衫、煮飯、掃地 …… 的事誌，其實就是查某的奴才。若做人的「媳婦仔」除了「查某嫺-á」愛做的工課以外，大漢復愛嫁hō͘彼家的人，等於是將生命佮身軀攏交hō͘ 彼家人，所以「媳婦仔」失去--的不是干焦婚姻的自主權，伊失去的--甚至是人身的自由權。

古早人認為媳婦仔的好處就是自細漢抱來飼性情較了解，大漢欲娶復免聘金，干焦平常時ho͘伊食穿但定[nā-tiāⁿ]，而且飼大漢猶會當鬥照顧其他的小弟小妹，做穡、款厝內……上重要的就是做親戚的時免hō͘人驚散，所以認為抱「媳婦仔」返來飼算起來較會和，散赤的庄腳人就按呢過日子，不過一向攏無人曾來問過「媳婦仔」：這款潦潦草草的婚姻敢有公平？

除了媳婦仔捒做堆的方式以外，當然嘛有用正式嫁娶的禮俗。

親像阮老爸老母就是古早式的婚姻，阮老母講伊是坐轎嫁--來的，伊的外家住[tòa]佇竹圍內（第六鄰），阿爸住棉仔間(第四鄰)，差兩鄰、路彎彎斡斡無夠一公里遠，不過老母少年的時陣較大箍，扛轎的人攏笑伊、會壓死扛轎的；我會記得厝內猶有一領朱紅色的鳳帔(新娘衫)，頂面繡真濟花佮龍的物件，時代久遠無什麼印象，不過頂面有幾若股色線做的纓垂(穗)仔，垂仔頂復有結一寡珠仔，有鉛線色、有紅色、嘛有黃色的……花紅柳綠一大綰，均屬(反正)彼領、已經hō͘老鼠咬一孔，所以若「辦傢伙仔」的時陣！有欠用珠仔就去偷捻幾粒仔，老母會罵，不過罵久就麻痺，嘛是照捻無誤，所以無偌久hit領衫就擲掉阿……我一直計是我大漢就會佮我身邊的大人共款，嘛會坐轎嫁出門，後來才知影，不是逐個人攏有結婚這件事誌，原來攏是媳婦仔。

佇我熟似的人內面、有足濟攏是「媳婦仔」，親像阮二姊的ta-koaⁿ(大官)，阮叫伊交伯仔，交姆仔號作蜜仔，伊就是自細漢佮老母tòe 轎後來的，九歲的時，序大人就予伊佮交伯仔睏做伙，15、6歲就ka捒做堆，17、8歲生大子。我的親阿伯「溪河伯」自細漢小兒麻痺，阿公驚伊痂腳大漢娶無某，就kah隔壁庄的人參詳討一個來做「媳婦仔」，不過對方講會使是會使、你嘛愛一個hō͘阮，所以阿公就將m̄-ti̍h仔姑予in做「媳婦仔」，就將阿枝姑送來阮兜予阮做「媳婦仔」……不過這兩件姻緣尾仔攏無成，因為溪河伯死去，m̄-ti̍h仔姑彼爿嘛出事誌，所以尾仔兩個阿姑大漢了後就另外嫁予別人。不過「媳婦仔」一旦kā人分來啊，就算是家己的查仔子囉。所以就變做足奇怪的情況；阮兜飼的是別人的查仔子、阿枝姑，家己親生的m̄-ti̍h仔姑，顛倒佇別人兜咧生活、予別人飼，這就是「媳婦仔」無合情理的所在。

做人的媳婦仔命好命歹攏愛看伊的運氣，總是大部分攏是一翁一某，除非遇著歹ta-ke-koaⁿ，日子猶bōe足bái()，上驚的就是黑白予人賣去，買的人是熊抑是虎攏不知才是害。親像阮一個親戚的查仔子，細漢無人緣，阿媽就kā 伊賣乎人做「媳婦仔」，好佳哉尾仔聽人講買伊彼個人不是好物，親戚驚家己的骨肉予人賣入煙花，才趕緊復討返來，若無就害囉。

上慘的就是表面講做「媳婦仔」，其事是欲賣入àm-sàm 間仔（妓女戶），我的二姊講，伊細漢佇工廠學做緯仔，有一個做工仔伴上驚老母來叫伊，逐擺若來叫伊、伊就覕咧不敢出去，老母就叫頭家來鬥叫，頭家講伊無這呢失德、嘛不鬥叫。做工仔伴，問伊是按怎無愛出去，伊講老母欲給伊賣予人做媳婦仔，對方欲來對看、不才會欲叫伊返去。有的人勸伊講查某囝仔早慢愛嫁人，散赤人予人做媳婦仔、嘛真正常，勸伊愛認份；不過伊講這擺不是要做普通人，是欲賣予菜店……不過規尾伊嘛是逃bōe出命運的作弄，嘛是走入煙花，尾仔做人的細姨。這就是「媳婦仔」無人知影的的悲哀。

有當時我咧想，散赤的人有影khah輸一枝草，準講你若是一枝草，凡勢嘛有人會來看你，給你沃水、沃肥，上少嘛有天公伯矣三不五時落雨予你洗身軀，嘛有日頭通予你燒熱，不過你若是散傭人的子兒，你就未輸一隻牲牲、予人賣過來賣過去，自古以來散庸人攏是按呢，查甫做長工、做奴才、做太監，查某做嫺、做妾、做「媳婦仔」、做妓女，……，其實按呢講嘛不是足公平，佇上層的社會，查某子嘛共款予人用來做政治交易，親像「秦晉之好」的典故裡，查某子就是國佮國聯盟的禮品。因為佇古早人的觀念內底，干焦有家族的利益，兒女的幸福根本不免考慮，尤其查某子往往攏是父權謀取政治佮財富的工具；較早讀三國的故事，有一個故事使我足難忘：袁術欲佮呂布聯盟，要求娶呂布的查仔子做媳婦，呂布答應，不過呂布尾仔想想咧算bōe和，佇迎娶的半途復將查仔子搶返來。無偌久，呂布遇險、需要袁術救援，呂布就連夜將查仔子用布縛佇馬頂，送去袁術的營中……，這個故事內的呂小姐，絕對不是新娘，伊只是老父爭權奪利的貢品但定[nā-tiāⁿ]。可憐！伊一生的幸福就按呢葬送佇伊的親生老父手裡！親像這款的惡行、濟kah有影是罄竹難書，這敢不是足酷刑、足無人性咧？