囝仔時代食冰 @ 阿等

2010．10．1

我是一個庄腳囝仔，今仔雖然住佇都市，食穿攏足方便，不過阮嘛是會懷念，庄腳的空氣，庄腳的日頭，庄腳的風，庄腳的土味，雖然都市，共款有日頭，有風，不過都市的空氣、風、佮日頭、就是無法kah阮庄腳比，不知是按怎都市的空氣感覺起來就是būe 清，日頭就是不會焰，上重要的就是無我熟似的笑聲，尤其是無我愛食的冰啦。

我做囝仔的時陣，佮今仔共款，熱--人攏是熱kah欲piak-pa，hit 陣仔我上期待的就是阿爸叫人去買一「tshiú」（一塊立方體的冰塊）冰返來予阮食啦。我常在講七歲就開始佇田裡鬥做工課，其實攏嘛是半做半傸(耍)，做無若久就喝殄(喊忝)，就等欲食冰。

阮hit陣仔食的冰其實真簡單，攏是大人叫囝仔捾ue仔去仔店買冰角，佇彼個時代一般店家猶無冷凍庫，冰角攏是囥佇粗糠內保溫，仔店的人知影你欲買冰就去粗糠內挖一「tshiú」出來，冰連粗糠囥佇ue仔內，你就愛將ue仔縛站(踮)鐵馬頂、趕緊騎--返去，若無冰會予日頭曝溶去、到厝賰無半「tshiú」，你就會予逐個罵kah臭頭，冰買--返來，就用菜刀銎(kheng)斵(剁)hoo碎碎，有當時心適興會加仙草、抑是米篩(苔)目、若無蕃薯纖嘛好，大部分攏嘛干焦掺黑糖抑是白糖但定，料足簡單，不過佇日頭下作穡，你若有一碗冰通啉實在足爽快，嘛足幸福。纖＝「米簽」

熱--人阮嘛是攏透早天猶未光就起床，早頓食飽，就愛tùe (綴)序大人去田裡作穡，若是殄(忝)，田溝仔有水通洗腳手面，不過水hōo日頭曝kah足燒，若欲尋(找)樹下較揜貼的所在，水雖然有較涼，不過蜈蜞非常濟，若予蜈蜞khîⁿ著、你是會哀父叫母喔。這个時陣上好是有西瓜尾通食，你就būe記得熱囉。

過去阮兜種的西瓜、攏是西瓜結實(果)無若久，就有人會來貿(bau̍h)去，貿西瓜就是雙方品好一分田若濟錢，貿的人欲收若濟粒，若講會合，貿的人就會將伊中意的西瓜tǹg一個印仔，意思就是這粒西瓜是伊貿的，所以būe使偷食，干焦會當等收成了後的瓜仔尾、才會使光明正大來食。

將園裡的西瓜貿--人、哪親像較食虧的款式，不過貿予人你就不免煩惱西瓜予風颱抑是雨水「買」去，只要你交會出來佮人品的數量，你就有固定的收入，būe親像「去海口種菅仔(竽阿)，白費氣力––血本無歸」，而且這個數量一定是比tǹg印仔的數量較少，所以你若繳會出來，凡勢你猶有一屑仔的西瓜通賣，所以阮兜攏嘛貿予人。貿的人嘛有好處，伊用較俗的價數，會當買較濟的西瓜，若好年冬大豐收koh風調雨順、伊就大趁，所以西瓜貿予人就親像一種心甘情願的跋筊。

斯當時出去、若有瓜仔尾，阮就kā 伊挽落來，用「手刀」對中央斬(cháⁿ)--落去，給伊扑破，兩三個人做伙食，食西瓜兼洗面嘛是真趣味喔。除了食西瓜，腹肚若枵，阮就向望媽媽擔蕃薯纖(籤)湯來止飢，上好是甜的蕃薯纖湯、內底koh有摻一寡冰，he就有影會歡喜kah掠būe條囉。除了作穡有冰通食，有當時暗時仔、抑是特別的情況嘛有冰通食：

阮厝埕邊有種兩欉葡萄，葡萄藤足豔，有時會旋入厝內，會記得有一擺熱--人的時，中晝大人teh歇睏，規陣囝仔站(踮)葡萄下tshit-thô ，無張持有一个囝仔足大聲喝kah驚天動地，大家驚一下緊倒退走，你敢知影是發生啥事誌？原來不知一尾什麼蛇，順葡萄藤趖去厝角，吊佇葡萄椏koh站彼(踮遐)咧吐信仔（吐信），阮這寡囝仔、大家攏有夠驚，大人koh笑阮是惡人無膽。不過彼工阮遇著的是「雨傘節」，換準是你、你敢būe驚？話講倒轉來，住佇庄腳看著蛇其實嘛無啥貨，親像二伯in的桂竹林嘛曾掠著青竹絲，阮是雄雄看著不才會驚kah破膽。不過「大難不死必有後福」，你敢會知有啥好孔(康)呢？

食晚頓的時陣，阿爸講阮去hō͘蛇驚著，講欲給我壓驚，叫我飯食較緊咧、講欲tshūa我佮小弟去冰店食冰，噯喲、 oān-nā有這呢好孔的事誌！

阮三个行入冰果室，內面人無若濟，阿爸kā頭家叫兩碗冰，頭家就對冰庫提冰角出來，用水kā 冰頂面的鋸屑hu洗清氣，才慢慢放入去青色的剉冰機，剉冰機頂面有一個圓盤，有一個用柴做的扳柄(pian-pèⁿ)(握把)，頭家用扳柄將轉盤躠無幾圝，一碗白雪雪的冰就出來-à，干焦看、我的嘴(喙)涎就giōng欲流出來囉……頭家koh問看欲摻啥貨，阿爸講有什麼口味，頭家講、看是欲清冰、四果抑是梅仔冰，攏嘛應有盡有，阿爸問糖呢？頭家講：「純的啦！無摻糖丹啦……」頭家koh講無甜免錢啦，尾仔阮叫一碗梅仔冰，一碗紅豆冰……，冰來囉，攑湯匙、挖一嘴(喙)先含咧嘴內，才大大嘴kā吞--落去，哇~頭殼giōng欲凊煙，這款冰實在有夠讚。會當去冰店食冰有影福氣啦！……這個時陣我嘴裡食的根本就不是干焦冰但定，其實猶有一種足單純的享受佮幸福！

冰一嘴(喙)續一嘴，清涼幸福的感覺、嘛一嘴(喙)續一嘴吞入去心肝芛仔內底，這種的享受我永遠嘛會記得！古早人咧講：「五月火燒埔、六月無乾路」今仔的日頭共款嘛是赤焰焰，特別是熱--人的日頭彼呢焰，連點馬膠嘛giōng欲溶去，厝內的度針嘛giōng欲磅破，連風嘛不知走去叨位覕！規身軀攏不時黏黐黐，規工būe輸落落水底共款，實在有夠艱苦。現此時你除了吹冷氣，你嘛會使kah我共款去冰店、叫一碗冰，不管伊是八寶冰、芋仔冰、抑是牛乳冰，均屬(反正)只要有一碗冰，你的熱天隨時嘛會變做春天。這種感覺我是做囝仔時代就按呢想的。食剉冰也會使講是我熱--人的生命，嘛是我做囝仔的時上好的享受。