2010.10.27

人咧講頭毛是三千煩惱絲,確實無不著。不管你欲插(睬)伊抑不插伊,伊照常一直發。你若是查甫人,你欲剃五分仔頭、hái-kat仔頭,甚至剃光頭嘛會使得,若是查某囝仔,你就一工到暗愛煩惱是欲直~-直的妹妹頭,抑是siatth 膨獅獅的獅仔頭,你若欲電頭毛是欲電大波浪抑是弓蕉條……抑是較時行的「離子電、番麥鬚電、……」查某人為著這粒頭鬃,有影是暝連日mooh咧想、心頭亂紛紛尤其我是虯毛的,偏偏仔我的虯毛不是虯規粒頭,干焦虯兩个鬢邊,逐擺去頭毛店,剃頭師攏愛舞規半晡,復嫌我的頭毛歹處理,伊是專業的剃頭師猶嫌歹處理,我逐工愛處理頭毛,你敢會知若tak-tînn

 

古早人講頭毛是「煩惱絲」,有影足有道理,特別是我做囝仔的時陣,更加可惱!hit個時陣庄內有兩個「剃頭婆仔」,阮兜攏予「素伊仔」剃,「素伊仔」是一個肥肥仔笑瞇瞇的婦人人,in翁「剃頭雀仔」嘛會曉剃而且技術真好,不過我上驚的人就是伊。

 

剃頭雀仔」是一個穿插足斯文的人,看著人就文文笑,應該是一个得人和的人,不過我足驚看著伊,因為in的查仔子kah我共名,伊若看著我就講你kah阮查仔子是giô的(同名的意思),你嘛是我的查仔子,你未使返去,你愛留佇這(遮)予阮做子喔……逐擺伊的嘴(喙)若開我就開始哭,講無愛予伊作子,欲返去……會使講逐擺去剃頭就愛予伊創治,不過伊剃頭足頂真,剃頭毛清氣koh būe 破相(傷),所以頭毛若長,序大人就tshūa我去剃。Hit陣仔我猶細漢坐佇椅仔歹鉸,「剃頭雀仔」攏愛佇椅仔頂靠一塊柴板,才 我抱起來囥予好,按呢坐、我的頭差不多kah剃頭雀仔」的嚨喉平高(懸),對鏡裡看會著伊的面,若看著伊創治我的眼神,我就緊頭向落去,伊就輕輕-a復將我的頭扶--起來,……

 

  我的囝仔時代嘛tùe (綴)著向頭、攑頭……沓沓仔無去。

除了去剃頭有當時阮嘛會tùe(綴)大人去「剃頭雀仔hia(遐),不過不是為著剃頭,是因為剃頭店的正對面就是「中山堂」,亦就是民眾活動中心,有當時是去開里民大會等領茶箍(肥皂、或sap-bûn),有當時去選舉,因為愛等真久,大家就會入去hia (遐)坐坐咧,順續(紲)聽一寡有的無的。有一寡事誌雖然經過彼呢濟年,我猶足有印象:

 

我囝仔的時代,台灣的選舉風氣猶真落伍,不過大人對選舉猶是真熱,所以若到選舉期大家就會偷偷tshi-tshi tshu-tshu teh議論,議論啥貨?阮是囝仔有耳無嘴(喙),阮不知;不過厝內無因無由有人送茶箍抑是送味素,阮嘛tùe人足歡喜;聽人講食蘇×輝的的粽選予姓呂×民,阮嘛感覺真心適,尤其是若選舉開票hit工的暗時,五點到七點一定會失電……有人講「中山堂」邊的甘蔗園哪親像有光影,不過嘛有人講你什麼嘛無看著,不過逐個攏知影,甘蔗園的光若無去,就有電通開票啊……

 

hit陣仔有美援的,有當時鄰長會叫人去「中山堂」領麵粉抑是大麵乾,領若濟,hit陣仔少歲,būe 記得,干焦會記得麵條足長,若有麵粉猶較好,媽媽會發饅頭予阮食,若無嘛會做鼎邊趖予阮孝孤,上少嘛會做麵糊予阮啖糝,(麵糊是一種真家常的麵食。作法足簡單,干焦將麵粉摻一寡水作麵糊,鼎水若滾,用手揉做一粒一粒擲落鼎、摻蕃薯、肉絲、青菜煮熟就是芳kòng-kòng,kòng-kòng芳的好食物,是足難忘的點心。

 

我嘛曾佇「中山堂」讀過一工的幼稚園,he是因為序大人嫌我傷瘦,聽人講讀幼稚園有免費的牛奶通啉,不才會叫我去,不過我būe曉華語,聽老師講話若鴨仔聽雷,所以第二工就無復去囉。雖然牛奶啉無成,不過一个囝仔,家己一個人對四鄰行去七鄰去「讀冊」,對我來講未輸去冒險、遠征,我感覺佇hit工我變足大漢,因為有這種感覺,所以經過這呢久我猶會記得hit工驚koh歡喜的心情。會記得幼稚園放學返來,猶未過晝、媽媽猶咧煮飯,我倒佇戶限(hōo-tēng)等食飯,我雙腳翹佇門框,看天頂的雲慢慢仔飛過,中晝的日光koh溫暖,灶腳陣陣飯的芳味……hit工我感覺足幸福。

 

不過去剃頭雀仔hia (遐),抑是「中山堂」,不是逐擺攏即呢好孔(康),有一站仔,阿爸收荷蘭豆仔予人做罐頭,因為欲做罐頭愛倩人絲豆仔莢,抑是剝豆仔仁、豆仔量足濟,所以借「中山堂」做倉庫,為著安全我佮小弟tùe (綴)父母睏佇hia ,有一暝北風siú- siú叫,外口嘛phín-phín- phòng-phòng,風聲裡哪像有人在詈罵……嘛有人在嚎叫……原來是隔壁庄的婦人人tshuā一大堆人來tsia (遮)抓猴,……第二工大(逐)家攏tiàm (踮)剃頭雀仔」hia議論紛紛講:大某若厲害,細姨予人打外殄(忝)……復講搶人的翁lūa 不著,不過攏無人指摘娶細姨的人、放某放子若無應該,人講「一某無人知、兩某卸四代」,風流的人敢不知?

 

hit 暗,我嘛知影查甫kah查某永遠無平權。

少年的時愛媠為著頭毛費盡心情,不時出入「剃頭店」,今仔規氣鉸hoo短短,就不免復煩惱囉,不過雖然不免煩惱頭毛形,續開始煩惱落頭毛,嘛煩惱敢有一工會變禿頭,復若準無變禿頭、白頭毛愈來愈濟嘛是足煩。敢講我嘛愛學查甫人剃金光頭,頭毛的煩惱才會放我煞?唉!伶俐的你、是按怎處理你的「三千煩惱絲」咧?

創作者介紹

阿等

adan2008 發表在 痞客邦 PIXNET 留言(0) 人氣()