2010.11.05

叔伯阿嫂嫁查仔子,因為新娘三十外~外–才嫁,阿嫂足歡喜、足厚禮,送足濟的喜餅hō͘我,有盒仔餅、有月餅盒仔、嘛有酥餅,可惜無我愛食的大酥餅--「風吹餅」,若有不知有若好咧

 

風吹餅是鹿港地區,婚禮喜慶傳統的大餅,所以阮hia (遐)嫁娶若欲送風吹餅攏愛去鹿港定做(tiāⁿ-tsò),聽講早期鹿港人結婚定製喜餅,住佇鹿港南爿的人愛選朝和餅店的餅,北爿的人愛去錦興餅店交關,阮和美是佇鹿港的北爿,阿嫂送的餅當然嘛是錦興的餅。一般來講,風吹餅外皮būe(不會)油膩,有淡薄仔親像台中的太陽餅,不過較硬一屑、而且足薄,餅的厚度無超過半公分,又koh大塊(tè),直徑應該有三十公分彼呢大,餡有奶油麥芽的香味、būe būe 粘、足好吃。

 

我曾問人是按怎這款餅號作風吹餅,內行的講:較早做的喜餅足大,為著欲予餅較緊冷落來,就將大餅囥佇外口予風吹,所以叫做風吹餅。不過阿爸講的無仝,阿爸講嫁查仔子未輸放風吹,嫁出門未輸予風飛去,吹到叨、是好是歹無人知,不才號做風吹餅。我不知誰人講的較著,不過我愛聽老人咧講的風吹餅故事。

 

老人講較早嫁查仔子,序大人攏會將風吹餅藏佇嫁妝、hit-kha尿桶裡底,是按怎愛按呢做咧?這是因為較早嫁娶交通無方便,驚būe赴吉時,往往足早就愛坐轎出門,路途遠、難免枵飢失頓,古早的新娘較pì-sú (閉塞),準若枵嘛不敢講;拜過天地,坐桌的時驚人笑大面神、不敢食,所以有當時就會餓規工;而且抵嫁過去復驚大家嫌伊賢食,只好繼續餓肚……所以老人講做新娘有影足艱苦。序大人為著驚新娘枵,攏會偷藏風吹餅佇尿桶內,新娘若枵就會當偷拿出來食,所以細漢的時若看著人偷四秀仔咧食,囝仔伴就會笑伊是新娘咧偷食。

 

嫁娶的風吹餅是貴抑俗、我不知,我干焦知影,嫁娶hēng / hīng口份,一般的厝邊、朋友無咧hēng風吹餅,干焦至親的親情才有,最近阮的親情嫁娶攏用西洋式的禮餅,風吹餅我嘛足久不曾食過囉。上尾擺食著風吹餅是三姐嫁查仔子的時。三姐特別留幾若封hō͘ 我(一封六塊用塑膠袋仔橐),彼個時老母猶佇咧,媽媽上愛食風吹餅,三姐特別定一大hō͘伊、內面有幾若十塊,然尾媽媽復偷幾若塊hō͘ 我,我叫伊不通、家己留咧食就好,伊講這是嫁娶才有、台南較希罕,阮tsia嫁娶濟,伊不時食會著,叫我提--返去,伊若食了,想欲食會使叫人去鹿港復買,其實我嘛知今仔連鹿港嘛少人咧做,不過būe堪得媽媽咧講,嘛是復提--返來,今仔想起來特別感念媽媽的慈愛。

 

想著媽媽就想著鹿港有媽媽愛食的牛舌餅、麻、米麵茶、有阿爸愛食的蝦猴……因為按呢嘛予我想著一寡往事。

風吹餅別跡有無我不知,干焦知影阮hia(遐)若欲食好食的風吹餅就愛去鹿港買,風吹餅應該是鹿港的特產,和美鹿港相差九公里,在今仔有車的時代一二十分就到啊,不過佇較早不是用行的、就用鐵馬的年代,鹿港對阮來講實在足遙遠,阮兜嘛無親無情佇鹿港,所以較早鹿港我不曾去過。

 

頭一擺去鹿港是因為國中二年的時,導師tshūa阮去參觀辜顯榮的祖厝––鹿港民俗文物館,彼工阮足濟同窗做伙騎鐵馬去,行入鹿和路,沿路行過仁愛學校(現國立和美實驗學校)看到hia--ê學生坐tiàm (踮)輪椅hō͘人捒出來tshit-thô頭一擺看著坐輪椅的人būe曉同情in,干焦感覺稀奇。欲去鹿港沿途會看著真濟奇奇怪怪的路名,親像番雅溝、頂番婆、旗營、麻井溝、澎湖厝、田洋莊、有應公、小陰公……等!到位tùe (綴)老師後面行一寡彎彎斡斡的路就到辜顯榮的厝––「大和大厝」,一群人看著「大和大厝」豪華的外觀未輸曆日內底的總統府抑銀行的氣派,逐個攏大嘴開~開-開,gāng~ gāng- gāng,有影是庄腳進城啦。

 

老師叫阮先tiàm (踮)外庭排予好、伊欲 阮翕像,大家嘻嘻嘩嘩翕(歙)幾若張像,才開始參觀(今仔參觀愛買票,hit陣仔哪親像不免票),有看著啥貨今仔其實攏būe記得,干焦知影內底的物件,無論是古早人的衫褲抑是門窗戶扇,無論是刀工抑是色緻攏真,逐項物件攏金閃閃(爍爍),每一扇窗仔、每一支柱仔、每一面牆壁、攏有好額人的貴氣,實在予人料想būe 到,親像共款的盛(謝)籃仔,阮兜的是藤仔做的,年久月深khā 足濟垃圾仔、烏鏽烏鏽oo-sian oo-siantsiâⁿ歹看!人in的金噹噹,有影好額人的氣派就是無仝,若對二樓看--落來,無論斡角抑是厝內攏有花草或是瓶、罐做佈置,對我這个庄腳囝仔來講有影是大開眼界。印象上深的是一座用足濟酒甕做的牆仔,老師講這號做「甕牆」(現今甕牆,佇中山路和興派出所邊的巷仔內,阮去的時甕牆猶未予人圍起來,在文物館、甕牆就會使直接看著、摸著),老師講是按怎會用這呢濟的甕仔做牆咧?he是因為一府二鹿三艋舺,早期鹿港靠船做生理,船隻用酒甕杉仔來壓艙,保持船隻的穩定性,所以有真濟的甕仔,用來做牆仔,一方面廢物利用一方面會使展伊有錢做生理;嘛有一種的講法是,古早鹿港人照中國的風俗:若生囝仔,就愛買一寡紹興酒埋(tâi)佇土底,後擺後生若考著秀才抑是舉人,就將酒挖--起來、提來請人,取吉兆號做「狀元紅」,若生查仔子、嫁出門會使做嫁妝,嘛會使佇倒返客的時提來請人,這就是「女兒紅」,對這個風俗嘛會當看著鹿港人受中國文化的影響。想著人的甕仔囥這呢咧予人看訪(老師這句話我家鄉真的這麼講的)阮兜的甕仔,干焦咧予我囥「蹌跤雞」的石頭仔,實在差有夠濟!

 

這擺我對辜顯榮的祖厝kah鹿港人,印象真好,嘛感覺這應該是彰化人的光采讀高中的時,一班四十外個人、鹿港人佔十外~外個,而且成績攏一个比一个較好,連老師嘛是鹿港人,害我這个庄腳攏不知欲按怎kah in講話,彼個時陣我才知影鹿港的人若賢讀冊。無想著有一擺上課講到鹿港,一位姓廖的地理老師咬牙切齒講:辜顯榮hit个漢奸,是阮鹿港的敗類……我才雄雄想著民間對辜顯榮的看法……換一個角度看著的有影就無仝囉。

唉!美麗的故事背後難免嘛有烏影啦,莫怪人講:「媠,媠無十全;bái、 bái無歸團(加圇)」。

創作者介紹

阿等

adan2008 發表在 痞客邦 PIXNET 留言(0) 人氣()