公告版位

序楊麗卿台語散文集《頭前寮人》

呂興昌


~伊用母語的目睭重再看,看故鄉草木蟲魚迷人的形影,用母語的耳孔重再聽,聽故鄉序大序細予人感心的聲嗽,用母語的頭殼重再想,想故鄉古早、未來的黯淡佮光彩~


 

麗卿是我佮太太吳達芸教授khah成大中文系教過的學生仔,伊tùa阮故鄉彰化和美「塗厝厝」的隔壁庄「頭前寮」,佮阮上細漢的小妹仔玉英是同窗;三十外冬前,有tang時仔[siunn]無閒,就會勞煩伊替我tsah一寡有孝序大的物件tǹg去厝裡,講--起來,阮這个師生緣是有khah特別,有khah親;伊親像家己的小妹仔。尾仔伊卒業[tshut-gia̍p]陪翁婿朱銘祥去美國深造,銘祥學成歸國成做成大機械系的教授,伊也中學教冊,無疑誤我煞離開成大中文系轉去清大文學所、中語系開創台灣文學的研究佮教學。這中間阮khah無聯絡,一直到2000年成大成立台灣頭一間的台灣文學研究所,我轉tǹgtsia教冊,阮tsiah koh開始密切的來往,特別是2005年退休了後,阮的關係有進一步的變化:我這个中國文學底的學生──紅關公,白目眉,無人請,家己來──自發的[te̍k]的,無講無tànn,煞台語文學的路上[tsiūnn]重再來相tn̄g頭!

麗卿對中文轉過來台文的寫作,是伊生命當中一个真重要的分道盤;伊雖然有būe bái的文學té-tìm̄-koh因為教冊、成養[tshiânn-ióng]三个囡仔、有孝序大佔去伊所有的時間,suah罕得看伊有文學創作發表。一直到幾冬前,伊tshūe我參詳beh按怎將家己的母語koh khioh--tńg來,順續(紲)koh kai--出來?我就紹介伊去成大台文系聽巫義淵老師的課,伊隨去試聽,一下聽,就tiâu--咧;義淵兄社區大學所開的課,伊嘛逐期攏去選修,自按呢,媠kah有賰的母語,伊的心肝底kui个復活[koh-u̍ah]--起來,文學的生命也kui个精神--起來:阿娘的話tshūatńg去後頭厝頭前寮,伊用母語的目睭重再看,看故鄉草木蟲魚迷人的形影,用母語的耳孔重再聽,聽故鄉序大序細予人感心的聲嗽,用母語的頭殼重再想,想故鄉古早、未來的黯淡佮光彩。走tshūe生命根源的心一下按定[hūann-tiānn],重再定位生命方向的熱情也做一下展開[thián-khui],伊就義淵兄的指導下沿路學沿路寫,對上基礎的台羅書寫學起,一點一滴、一篇一篇,ta̍uh-ta̍uh-á熟手,伊的文學湯頭也愈來愈gâu[gô],熬--出來的食物[tsia̍h-mi̍h]嘛愈來愈腥臊[tshenn-tshau]

義淵兄是我真mah-tsih的台語伴老兄弟,麗卿若有好文章,伊就會轉寄予我gán--一下,見擺讀伊的文章,我就定定有心涼脾土開的歡喜,因為對現實的經驗來講,阮tùa隔壁庄,伊減我14歲,囡仔時代的生活差不多攏相共,伊所寫的一寡人,比如講hōng請去頭前寮摃狗的銀行仔,tùa阮隔壁大廟邊,真熟sāi;乞食婆金枝仔,嘛定定來阮兜分食食[tsia̍h-si̍t]tsiah-ê人,伊的筆下,攏寫kah真出色,佮我所知的攏誠相共。會使講,伊冊裡所寫的,逐項都會予我想起五六十冬前值得數念的一寡liu-liu khok-khok的事誌,予我有一種重回故鄉、去老還少,ha̍p-be̍h氣毛子[khi-mooh-tsih] kui-ê giang--起來的爽快!

Ah nā對文學本身來講,一來伊佮我共款,中文系出身的文學訓練,不但[m̄-nā]無妨礙伊行向[ǹg]台文的大路,顛倒予伊真緊就hānn過台語,進入台語文學的的天地,也就是講,伊無論抒情、描景、寫人,攏有藝術的手路,足有文學素質的mê-kak,不是一寡對台語文學無giàn理解的學者所鄙相[phí-siùnn]的,「有台語,無文學」;二來伊的文學語言雖罔古意老實,無奢華[tshia-hua]的妝thānnm̄-koh一字一句不時講著人的心肝芛仔,特別是伊真gâu用台灣俗語,用kah真鬥搭,真tshin-tshiohbūe tshàu tso̍ktse是麗卿的特色,嘛是庄腳氣口的力頭,值得o-ló

Tsit-má麗卿將伊所寫的文章,選出40篇集做伙準備出版;論真講,tsiah-ê散文真有時代感,內容保存būe少已經ûn-ûn-á咧消失的生活經驗,親像「有一工阮阿爸遇著一個田頭家講伊欲賣田,問阿爸欲買booh?阿爸講:『…我散kah欲予鬼掠去、哪有錢通買!』田頭家講阿爸雖然無錢、不過有信用,就講、我的地先賣予你,你才閣去招人公家買就好有遮爾譀的事誌,阿爸有影就用身軀的八箍銀買一兩甲地。」(一枝菸)Koh像「每一擺我返去外家…攏是天大地大的事誌,大姊、二姊、三姊攏會返來開講。厝埕本來就有一口三尺二的大鼎,就地會當使用,二姊、三姊gâu煮飯,做總舖師,我佮大姊頇顢就做水腳」(父母疼囝長流水),這个「水腳」是針對頭手總舖師講的,就是二手的意思,tsit-má已經罕得聽人按呢講咯[looh]。另外,栽培瓜仔號做垡瓜[hua̍t-kue],別所在嘛khah無咧講(烏貓珠仔);因為麗卿的書寫,予咱koh khioh tńg來真濟歷史的記持。

koh有,伊筆下的庄腳人,攏真有特色,讀了就會記tiâu-tiâutse表示麗卿佇人物塑造的文學手路頂面不止仔老練。親像佮楊麗花共名的阿花姑,寫伊的粗線條,有予人料想būe到的諏古[hàm-koò]:「伊聽著老父來看伊,對樓頂三步做兩步走,抱嬰仔落來欲予 in老父看,落來開講足久,in老父講:『你毋抱囡仔來予我看,kho̍k-kho̍k抱枕頭咧tshòng 甚?』阿花姑驚一下,講:『siâng  kā我的囡子偷抱去,……』就放聲哭,in老父叫伊較鎮靜咧,去樓頂看māi 咧……原來阿花姑真正抱毋著,囡仔猶佇眠床頂teh睏啦!」

另外,伊作品內底定定會出現一種看起來平常平常但是又koh相當特別的思想意味,予人讀著真有感覺,有當時仔心肝強beh háu,有當時仔心肝koh會微微仔笑,比如講伊寫古早散赤囡仔的命運按呢講:「有當時我咧想,散赤的人有影khah輸一枝草,準講你若是一枝草,凡勢嘛有人會來看你,你沃水、沃肥,上少嘛有天公伯三不五時落雨予你洗身軀,嘛有日頭通予你燒熱,不過你若是散傭人的囝兒,你就būe輸一隻精牲、予人賣過來賣過去,自古以來散傭人攏是按呢,查甫做長工、做奴才、做太監,查某做嫺、做妾、做『媳婦仔』、做妓女,(媳婦仔)koh像伊寫放屎的事誌:「阮的公族因為土地持分的關係,屎礐仔只好起做伙,攏總有六間排做一排,阮兜是第三間,俗語講:「肥水不落外人田」,所以去屎礐仔無論你若緊,攏būe使放毋著間,若無會予大人罵討債,彼陣仔大肥真價值,有時陣猶有人會偷舀肥,所以風俗若較無好的庄頭,屎礐仔門猶著鎖--起來」(方便之所)。媳婦仔的苦命佮屎礐仔的文化,實在予人也目眶紅也愛笑。另外,麗卿徛佇查某人的立場所寫出來的女性,嘛定定予人有進一步思考古早佮現代的女性,到底有啥乜無共的生命觀;親像〈頭前寮庄的查某人〉,伊對老母寫起,講「阮老母在生的時上捷講的話就是:『我--喔!做有啦、食無啦』、閣講:『紙頭無我的名、紙尾嘛無我的名』,有影!佇阮頭前寮庄的查某人in 攏無家己的名,in往往攏是啥人的媳婦、啥人的某、啥人的老母…所以你會記得逐个查甫人的名姓,不過你想būe出你逐工咧做伙、咧接近彼个查某人的名字,因為in的名可能干焦是木仔嫂、棟寶姆、得嬸niā-niāin攏是一群做有食無的查某人。Tsiah-ê查某人,「足濟人你規世人佮伊做厝邊,不過你罕得看著伊幾擺,因為伊永遠就是覕佇in老父inin囝的尻脊後,in būe輸無名無姓,除非你需要in來鬥做工課,親像好歹事愛in來鬥做水腳、鬥拆白布若無你是būe當看著in的形影。」Tsiah-ê查某人,「佇農業時代in是做田的高手,佇工業時代in愛去工場鬥趁錢,in būe輸是家庭的千手觀音,而且in嘛是寵翁的師傅,有一條歌講:『食好食bái 無計較,怨天怨地嘛būe曉,你的手,我會你牽牢牢,因為我是你的家後。』歌詞內底這个某,無怨嘆無計較,這款的吞忍佮包容,現代人絕對是做būe到的,不過頭前寮庄的查某人in會講『翁某是相欠債』…in嫁著的翁毋管是『蝦仔看著倒彈,蟳仔看著噴瀾,雞仔看著拍唂雞,狗仔看著吹狗螺』抑是撇送的人,in講:嫁雞tuè雞飛,嫁狗tuè狗走,嫁著乞食甘願揹茭薦 [ka-tsì]斗,所以in翁若咧臭彈抑是咧批評社會,伊毋但恬恬聽猶會泡茶予伊,閣講:『啉啦,才būe喙乾啦』,這款的愛情,現代人敢看有?」

進一步看,台灣自從本土化自主的意識攑頭了後,台灣文學史的新建構,也就是以台灣為本位、無koh將台灣khǹg tiàm別个國家下面去思考的史觀,就「兩岸猿聲啼不住」一直咧向前行,雖然最近有一寡雜音咧干涉這个大趨勢,m̄-koh背反這个趨勢的回頭路會使講橫直是變無輦矣,咱ài順這个趨勢,腳手mé-lia̍h,將大歷史落實tiàm日常的生活當中,麗卿這本冊,用樸實的文學手路,將活跳跳的村里故事一齣一齣kai--落來,就是這種落實上好的見證,嘛是予腳底的土地透氣、發聲上媠氣的方式,咱ài特別kai肯定。

煞尾猶有一tsân事誌ài kā麗卿恭喜--一下,舊年教育部舉辦台灣本土語言文學獎,麗卿用〈彼兩條長長的牛車路〉佮〈溝仔邊〉參加台語散文類教師組的比賽,結局著tio̍h第一名,這就表示伊來到生命分道盤所揀選的台語文學這條路,確實是揀啊揀,揀著一條會當拓展生命視野、分享美學經驗的大通路。向望麗卿這本快樂的出帆出版了後,會當繼續扑拚,將伊沿路所欣賞所致意的,五花十色的人生,kohkai採集、提煉、昇華,thang予咱的台語文學愈來愈豐沛[phong-phài]、愈來愈奢颺![tshia-iānn]

─2012.08.30,台南


創作者介紹
創作者 adan2008 的頭像
adan2008

阿等

adan2008 發表在 痞客邦 留言(1) 人氣()


留言列表 (1)

發表留言
  • 佩秀
  • 恭喜老師