公告版位

分媳婦仔,是漢文化的一種婚姻習俗,一般攏是將猶未成年的查仔kiáⁿ送去別人兜飼、抑是用賣的,等買彼個家庭的後生大漢才ka捒做堆、結做翁妻(某)。這種情形台語呼作媳婦仔[sim-pū-á]

 

佇四十、 五十年代抑是復較早進前,ㄧ般庄腳(莊稼)人的生活攏是種作為主,無親像今仔這呢多元富裕, 偏偏仔復無避孕的常識,逐個家庭的囝仔攏真濟,子濟雖然真好命,不過頭嘴濟食穿的問題就真麻煩,所以一般人攏有這款共同的壓力,囝仔大漢嫁娶的事誌猶較大條,所以才會發展出「媳婦仔」這個風俗。亦就是子濟的人將囝仔送hō͘較好額的人飼,不過傳統的觀念攏是重男輕女,大家攏愛飼查甫的,無愛飼查某的,按呢hiah查某囝仔欲按怎咧?有一部分就hō͘後生生較濟,驚別日仔娶無某的人飼做「媳婦仔」,若真正飼bōe起、只好賣hō͘人做「查某嫺仔」!

 

做「查某-á做「媳婦仔」敢有無同?ㄧ般來講做人的查某,干焦負責洗衫、煮飯、掃地 …… 的事誌,其實就是查某的奴才。若做人的「媳婦仔」除了「查某-á」愛做的工課以外,大漢復愛嫁hō͘彼家的人,等於是將生命身軀攏交hō͘ 彼家人,所以「媳婦仔」失去--的不是干焦婚姻的自主權,伊失去的--甚至是人身的自由權。

 

古早人認為媳婦仔的好處就是自細漢抱來飼性情較了解,大漢欲娶復免聘金,干焦平常時ho͘伊食穿但定[nā-tiāⁿ],而且飼大漢猶會當鬥照顧其他的小弟小妹,做穡、款厝內……上重要的就是做親戚的時免hō͘人驚散,所以認為抱「媳婦仔」返來飼算起來較會和,散赤的庄腳人就按呢過日子,不過一向攏無人曾來問過「媳婦仔」:這款潦潦草草的婚姻敢有公平?

 

除了媳婦仔捒做堆的方式以外,當然嘛有用正式嫁娶的禮俗。

親像阮老爸老母就是古早式的婚姻,阮老母講伊是坐轎嫁--來的,伊的外家住[tòa]佇竹圍內(第六鄰),阿爸住棉仔間(第四鄰),差兩鄰、路彎彎斡斡無夠一公里遠,不過老母少年的時陣較大箍,扛轎的人攏笑伊、會壓死扛轎的;我會記得厝內猶有一領朱紅色的鳳帔(新娘衫),頂面繡真濟花龍的物件,時代久遠無什麼印象,不過頂面有幾若股色線做的纓垂(穗)仔,垂仔頂復有結一寡珠仔,有鉛線色、有紅色、嘛有黃色的……花紅柳綠一大綰,均屬(反正)彼領、已經hō͘老鼠咬一孔,所以若「辦傢伙仔」的時陣!有欠用珠仔就去偷捻幾粒仔,老母會罵,不過罵久就麻痺,嘛是照捻無誤,所以無偌久hit領衫就擲掉阿……我一直計是我大漢就會佮我身邊的大人共款,嘛會坐轎嫁出門,後來才知影,不是逐個人攏有結婚這件事誌,原來攏是媳婦仔。

 

佇我熟似的人內面、有足濟攏是「媳婦仔」,親像阮二姊的ta-koaⁿ(大官),阮叫伊交伯仔,交姆仔號作蜜仔,伊就是自細漢佮老母tòe 轎後來的,九歲的時,序大人就予伊佮交伯仔睏做伙,156歲就ka做堆,178歲生大子。我的親阿伯「溪河伯」自細漢小兒麻痺,阿公驚伊痂腳大漢娶無某,就kah隔壁庄的人參詳討一個來做「媳婦仔」,不過對方講會使是會使、你嘛愛一個hō͘阮,所以阿公就將m̄-ti̍h姑予in做「媳婦仔」,就將阿枝姑送來阮兜予阮做「媳婦仔」……不過這兩件姻緣尾仔攏無成,因為溪河伯死去,m̄-ti̍h彼爿嘛出事誌,所以尾仔兩個阿姑大漢了後就另外嫁予別人。不過「媳婦仔」一旦人分來啊,就算是家己的查仔子囉。所以就變做足奇怪的情況;阮兜飼的是別人的查仔子、阿枝姑,家己親生的m̄-ti̍h仔姑,顛倒佇別人兜咧生活、予別人飼,這就是「媳婦仔」無合情理的所在。

 

做人的媳婦仔命好命歹攏愛看伊的運氣,總是大部分攏是一翁一某,除非遇著歹ta-ke-koaⁿ,日子猶bōebái(),上驚的就是黑白予人賣去,買的人是熊抑是虎攏不知才是害。親像阮一個親戚的查仔子,細漢無人緣,阿媽就 伊賣乎人做「媳婦仔」,好佳哉尾仔聽人講買伊彼個人不是好物,親戚驚家己的骨肉予人賣入煙花,才趕緊復討返來,若無就害囉。

 

上慘的就是表面講做「媳婦仔」,其事是欲賣入àm-sàm 間仔(妓女戶),我的二姊講,伊細漢佇工廠學做緯仔,有一個做工仔伴上驚老母來叫伊,逐擺若來叫伊、伊就覕咧不敢出去,老母就叫頭家來鬥叫,頭家講伊無這呢失德、嘛不鬥叫。做工仔伴,問伊是按怎無愛出去,伊講老母欲伊賣予人做媳婦仔,對方欲來對看、不才會欲叫伊返去。有的人勸伊講查某囝仔早慢愛嫁人,散赤人予人做媳婦仔、嘛真正常,勸伊愛認份;不過伊講這擺不是要做普通人,是欲賣予菜店……不過規尾伊嘛是逃bōe出命運的作弄,嘛是走入煙花,尾仔做人的細姨。這就是「媳婦仔」無人知影的的悲哀。

 

有當時我咧想,散赤的人有影khah輸一枝草,準講你若是一枝草,凡勢嘛有人會來看你,水、沃肥,上少嘛有天公伯矣三不五時落雨予你身軀,嘛有日頭通予你燒熱,不過你若是散傭人的子兒,你就未輸一隻牲牲、予人賣過來賣過去,自古以來散人攏是按呢,查甫做長工、做奴才、做太監,查某做嫺、做妾、做「媳婦仔」、做妓女,……,其實按呢講嘛不是足公平,佇上層的社會,查某子嘛共款予人用來做政治交易,親像「秦晉之好」的典故裡,查某子就是國國聯盟的禮品。因為佇古早人的觀念內底,干焦有家族的利益,兒女的幸福根本不免考慮,尤其查某子往往攏是父權謀取政治財富的工具;較早讀三國的故事,有一個故事使我足難忘:袁術欲呂布聯盟,要求娶呂布的查仔子做媳婦,呂布答應,不過呂布尾仔想想咧算bōe和,佇迎娶的半途復將查仔子搶返來。無偌久,呂布遇險、需要袁術救援,呂布就連夜將查仔子用布縛佇馬頂,送去袁術的營中……,這個故事內的呂小姐,絕對不是新娘,伊只是老父爭權奪利的貢品但定[nā-tiāⁿ]。可憐!伊一生的幸福就按呢葬送佇伊的親生老父手裡!親像這款的惡行、濟kah有影是罄竹難書,這敢不是足酷刑、足無人性咧?

 

你敢有想過:人類的文明到底有偌濟是真正的文明呢?

創作者介紹
創作者 adan2008 的頭像
adan2008

阿等

adan2008 發表在 痞客邦 留言(2) 人氣()


留言列表 (2)

發表留言
  • 佩秀
  • 請問~什麼是"媳婦面"呢?
  • 親愛的佩秀
    你是要問「媳婦面」或是【媳婦仔面】呢?若是「媳婦面」意指面如滿月,面相善良有富貴相,是相親時婆婆媽媽愛的臉形,若是【媳婦仔面】則是苦著臉,宛如瘦盡折磨的女僕狀,像你就是標準的「媳婦面」,祝論文順利!

    adan2008 於 2011/01/02 22:26 回覆

  • 佩秀
  • 謝謝老師!!
    看到老師的解釋真開心,因為最近有位老師跟我說我有媳婦面,我不知道那是什麼意思,忽然看到這篇就想問問看!!
    台語差一個字還差真多!!
    謝謝老師