阿等

2010.11.6

人講一樣米飼百樣人，親像有人賢炊粿、有人賢講話、有人賢種花、有人賢垡瓜，有人賢吟詩、有人賢做生理……這寡本事有人是學來的，不過嘛有的人你千學嘛學būe來，親像黑貓珠仔的本領就不是你學會著的。 註：垡瓜[hua̍t-kue]＝栽培瓜。

黑貓珠仔是予牛踏無死的囝仔。聽講黑貓珠仔才八九個月的時陣，父母去田裡作穡因為無人通顧伊，只好kā伊抱去田裡囥tiàm (踮)畚箕內，據在伊家己tshit-thô，有一工兩隻牛不知按怎續(煞)相觸，lōng--起來，一隻牛對囥黑貓珠仔的畚箕hia lōng來，in老父老母驚一tiô講，這聲去--啊、穩死—è，無想著牛有靈性，看著畚箕有囥囝仔、自按呢跳過，所以黑貓珠仔才好運無死，人講黑貓珠仔這呢福氣，後擺仔一定會大富貴。復講伊是第三查仔子食命，……，不過伊的福氣不是祖公仔產來庇蔭(tì-ìm)--的，伊的好命是伊家己打拼--來-的。

黑貓珠仔不愛讀冊，不過伊尊重讀冊人，嘛懷念教伊讀冊識事誌的人。伊上懷念的人就是伊國校六年的老師––洪雪櫻，有一擺伊提一本畢業的紀念冊予阮看，he是一本黑色的簿仔，頭一頁是in同窗所寫的留念祝福話，差不多攏是「珍重再見」、「勿忘影中人」等……。伊特別掀(翻)洪雪櫻老師的相予大家看，伊講伊若較早予洪老師教著，伊的人生應該會kah今仔差真濟。

黑貓珠仔講伊國校仔六年，算算咧去學校的日子無一半。是按怎會按呢咧？這攏愛怪in兜無生後生，田裡的穡無人通做，厝裡若無閒就叫伊mài去讀冊，一日無去、兩日無去……，功課攏無寫，老師教的koh聽無，伊就不敢去讀冊。不過in老父嘛知影睛瞑牛(青冥牛)是無出脫的，無予伊去讀冊是會誤囝仔的前途，所以若有閒就叫伊去，不過伊講、伊驚去學校予老師摃，因為in兜無錢，若欲納代辦費，父母就會對開學拖到尾啊，若無就先對大的抑是第二先交，伊是第三的只好慢慢啊等，逐擺若去學校就會予老師處罰，若不是罰走運動埕(場)、就是攑椅仔枷跪咧，抑若無就會予人罰豎tiàm(踮)日頭下掠虱母……，所以伊足無愛去學校讀冊，in老父若叫伊去田裡khau草伊顛倒歡喜，有一擺我揹(背)冊包欲去讀冊，行過in的門口埕，看in老父攑箠仔對門後kā伊拖--出來，伊驚扑一直喝不敢……最後就順從老父的意思欲佮我去學校，不過伊行一步退二步，in老父只好箠仔tùe後面行，一直到出庄、in老父才返去，佇路裡黑貓珠仔才講伊的苦衷，我才知影黑貓珠仔是按怎驚讀冊。

不過升起來六年，黑貓珠仔就變做另外一個人，伊開嘴(喙)合嘴攏會講阮老師按怎按怎，伊足愛in老師，因為in老師不但būe (不會)扑伊，猶會呵咾伊乖，in老師koh問伊：「你這呢巧是按怎不(毋)愛讀冊咧？」，所以自彼工開始伊就足認真讀冊……可惜人賢天咧做對頭，黑貓珠仔因為傷慢讀、初中考無著，嘛自按呢kah學校講bye-bye，不過伊不時會想著洪雪櫻老師，因為老師已經調離原來的學校啊，所以無法度去尋(找)伊，後來佇伊事業較穩定的時陣，伊就四界去探聽老師的下落，皇天不負苦心人，歸尾予伊尋著(揣到)，想būe到hiah呢濟年，老師不但會記得伊，猶會記得伊斯當時的一寡事誌，予伊更加感動。啊！好的老師救一個囝仔，現實的老師不知毀掉若濟個囝仔。共款是老師，無共款的樣相(iūnn-siùnn)啦。

黑貓珠仔嘛是庄內的風雲人物，黑貓珠仔的本名是阿珠，伊身高無150公分，不過少年的時，伊是庄內唯一穿「迷你裙」、掛黑仁的目鏡，騎野狼125的查某囝仔，伊復足phānn（酷炫），所以大家攏叫伊黑貓珠仔。黑貓珠仔少年hit个時代庄內的查甫人、駕照攏是用買的，不過黑貓珠仔的駕照百分之百是家己考的，連in老父的駕照嘛是伊教的，伊賢講話、賢做生意，是大家欣羨的生意子。而且黑貓珠仔足穩重深沉(沉著)，伊曾(bat)救in父母的婚姻，一二十年攏無人知。一直到in老父欲過身以前，in老父才講出來。

事誌是有一冬過年，in規家去關仔嶺洗溫泉，in老父熟似一個女中（女服務生），不知按怎續(煞)kah伊戀愛，不時掩掩掩掩(ng-ng iap-iap)出去約會，若無就是講欲tùe(綴)人去遊覽，厝內的電話不時會giang（響）一下，不過接起來攏無聲，hit時陣黑貓珠仔in開店，店的生理嘛足好，伊感覺有各樣（koh-iūnn），所以伊恬恬(tiām-tiām)仔觀察in老父的動靜，有一工伊復感覺電話有各樣，所以電話來的時、伊將分機的話筒攑起來偷聽in老父講電話；伊確定in老父外口有查某，復較驚人的是in老父竟然欲佮這個查某私奔。伊知影未使kāin老母講，因為緊急無法度kah伊的兄弟姊妹參詳，伊就家己處理……。伊想，欲偷走頭一層就是錢，所以伊第先做的事誌就是無聲無說(息)將錢藏--起來。無若久in老父講伊欲去彰化補貨，叫伊顧店、復叫伊順續錢攏提--來，黑貓珠仔講厝內無賰什麼錢，車伊欲送貨愛用，店予老母顧就會使，叫in老父若欲去彰化騎oo-too-bai就好，in老父做賊心虛逐項攏應好……

二十年後in老父佇加護病房一定欲見黑貓珠仔，叫黑貓珠仔去替伊做一個法事，in老母問伊為啥事(tāi)？黑貓珠仔不講，in老母只好問老翁，老翁就實在講、講一二十年前的往事：原來hit工，黑貓珠仔佇彰化火車頭落南的月台出現，問in老父敢真正欲放捨某子是booh？……無人知影hit工黑貓珠仔到底用什麼理由勸in老父，均屬(反正) in老父從此無佮hit個查某連絡，干焦知影hit個查某無若久破病，雖然有拜託朋友叫in老父去高雄見伊最後一面，不過in老父有伊家己不得已的理由，然尾無去高雄，所以in老父一直攏感覺虧欠這個查某，才會臨終前叫黑貓珠仔替伊辦法事，按呢大家才知影黑貓珠仔的穩重深沉。

黑貓珠仔嘛是一个赤查某，有一站仔in翁因為交際應酬熟似一寡查某，舞廳的查某(扭)人客足敢死，半暝嘛敢敲電話來叫in翁出去，黑貓珠仔為著家庭，tiàm(踮)電話中kā查某siah，siah kah查某不敢koh來惹in翁……

黑貓珠嘛是一个堅強的人。有一站仔in翁駛車撞著人、生意復失敗，伊的生活悽慘落魄，不過伊足有自尊，伊būe硬欲糊死人，佇伊落魄的時陣，伊驚人看輕伊的查仔子，伊顛倒kā in查仔子穿kah足媠，伊講這是散人疼子的方式，我講這就是天下父母心啦。

黑貓珠仔嘛是一個有孝的人，雖然細漢為著無愛讀冊予in老父扑kah半小死，甚至會不時夢著in老爸磨菜刀欲刣伊，不過in老父破病的時攏是伊咧走(傱)，厝邊頭尾攏足呵咾伊。伊嘛會有孝tann-ke-koann(大家倌)，嘛tiānn-tiānn(常常)數念伊的tann-ke-koann，不時講、in tann-ke講：「心歹無人知，嘴歹上厲害」叫伊愛講好話，親像伊嫌家己傷大塊，面傷大、歹看，in tann-ke講būe啦，「面大好so粉」……有這款的tann-ke莫怪有這款的好媳婦。

其實黑貓珠仔是足笑詼的人，平常若有伊在場不但有笑聲嘛會足鬧熱。伊的歌喉足好、足賢唱歌，是庄內有名的歌后，伊復足大方、足有目識，所以in老父選鎮民代表的時就是伊負責攑麥克。伊嘛愛聽曲盤，尤其是「天生自然」的故事。Hit個時有一塊曲盤，呼做「天生自然」，講的就是白賊七矣的故事。

「白賊七」是對清朝晚期就開始在台灣流傳的民間故事，「白賊」就是講嘐潲(hau-siâu)話的意思，「白賊七」內底的主角叫做七仔或阿七，因為阿七愛講白賊騙人，厝邊頭尾就用「白賊」這個偏號來叫伊。「白賊七」攏是「阿七」這個人用騙局創治人的故事，雖然煞尾是七仔tiāⁿ-tiāⁿ (常常)講「白賊」受著報應，親像hō͘火燒死、hō͘流沙埋死、抑是hō͘水淹死，（古早人用這款殘忍的方式來教人、歹人無好尾，有勸善的作用）不過「白賊七」騙人的步數實在hō͘人料想būe到，是真笑詼的故事，所以「白賊七」嘛成做講嘐潲(hau-siâu)話的代名詞。

黑貓珠仔愛聽「天生自然」嘛愛講白賊七的故事予阮聽。

天生自然內底有一個故事，講有一工白賊七的親戚娶媳婦，大家攏來賀喜，厝內放百家春這款喜慶鬧熱的音樂，白賊七聽著音樂就tùe人唱，不過伊的歌詞變做：「親戚緊來看，朋友緊來看，阮父欲出山，緊來看……」，所以白賊七就予人罵kah臭頭，猶有一擺、有人問白賊七是按怎人的尻脽(川)會分做兩爿？白賊七講這是因為黃巢試寶劍，雄雄對石頭剖落去，尻脽(川)不才會分兩爿……。復有一工in三叔公、九嬸婆來in兜看伊，伊就足好心講欲請in，白賊七就叫in留落來hō͘ 伊請，in三叔公、九嬸婆想講天欲落紅雨啊，若莫（mói）hō͘ 伊白賊-à 騙去就好啊，抑敢欲予伊請，就講歹勢啦、欲返去啦，不過būe堪得白賊七一直留，兩個老翁公婆仔就留--落來，白賊七趕緊叫in某去炒菜，三叔公、九嬸婆聽著灶腳不時傳來tshi-tshi tsha-tsha的聲，心肝想講這擺穩當有通食啊，就一直等一直等……明明有聽鼎咧tshi的聲，不過攏無出菜，若問伊阿七，阿七就安貼in講煮足膨湃，復小等一下就好，等到有影大腸告小腸，九嬸婆走去灶腳看māi才知……，白賊七in某攑煎匙tiàm (踮)鼎一直lā，心適興就滴水落去鼎予伊tshi一下……哎！三叔公、九嬸婆又復予白賊七欺騙去囉！

白賊七的故事其實無啥貨，不過對黑貓珠仔的嘴(喙)講出來，就變做足笑詼，所以若遇著伊就koo-tsiâⁿ伊復講一擺，阮就復笑一擺。不過黑貓珠仔不是干焦會曉講笑詼，伊嘛足賢勸人。親像伊不時咧講：「家和萬事成」。有一擺in兄弟姐妹中間有淡薄激氣相鬥，伊的序細問伊欲按怎，伊講一個人若有一百日的好，你就愛記得伊一百日的好，不通干焦記得伊一工的bái，不通學人「九頓米糕無上算，一頓冷糜拾(抾)去囥」……所以伊kah in的兄弟姐妹會當復合和起來。

較早予人叫做「黑貓」，意思就是伊是一個時行復phann的人，kah今仔的辣妹共意思，是行佇時代頭前的人。黑貓珠仔伊有媠booh？有若媠咧？我不愛kā你講，上好你家己來阮棉仔間、家己看，你就知影伊有若媠？我干焦會當kā 你講：黑貓珠仔伊做人足媠，伊值得人尊重。